177

سوسیری

تحریر: نورشمس الدین

جم وختہ اسپہ تان واریو سوسیریان کم کوری اسوسی مگم استاذانان سوسیریو بو کوری اسوسی۔  مسہ اسکولو استاذو گومان کی لیتام مذہبی سینٹرو استاذو سوسیری باؤاوتائے۔استاذان دی ای سوسیریو انوس مہ سار خوشان باؤاوتانی وا ای نتیجہ نیسکو انوس.  یعنی سبقہ دی جم اوشوتام وا سوسیریا دی. معلم استاذوتے جُوواری لیکو قصو اچہ کیاوت کوم….

بہرحال مذہبی سنٹرو استاذ اسیتائے، سلطان میکی نامہ مشہور  اوشوئے. امو مݯھی فقط۔ ہݰ نو ریکا پت سوسیریانتے مہمیز کوراؤ اوتام۔

یومون مس ایوکون اوچے ݯھیر درے برٹ کوری مہ کریمہ دیتی تان ‘اففففف’ کوراؤ اونوؤ ماژاؤ پایان سر نست ہوئے۔

(میکیو دونہ بلاہ ݯوکی اوشوئے فروسکیو ہوستیں ہمیش موخو موریاؤ اوتائے، اففف راؤ)۔

خائے تھے کُروئی گوڑ بندو بوتی نس ہارینو جیپو لاکھی ݯت ݯت کپالو پھار دیاؤ اشپیڑو کوراؤ اوا ہتے اچتو ایہہ ݯوکیتام.

یورغالشٹ رے ژاغہ تورتام کی نست غیر پائے ٹھینکتو اسونی میکی پروشٹہ روپھی اسور۔

ریتائے کی ہمیتان زوموتے ایہہ ݯاکا اوا نست ہوتام آخری پائے ایہہ نیسی کم از کم  ای گھنٹہ اچہ تو ایہہ گے ورنہ چوکول گونی۔

جم رے ہوستو اچی الاؤ خلتار برٹو چھینی لوساؤ ٹھینگو ورازہ بی زومو گوݯہ پختوری پھریتام۔ ہانیہ ای پایو چوکول دیتی مہ نسو اف اوائے۔ نہ چاقو مہ سُم  نہ کُوݰیکو بوم، نہ کا یہ رویو کوݰیرو زیبونی، بیکو کیہ خاص افسوس دی نو کوری حال ہوتام۔

تھے بہرحال پائے ایہہ نیسی کافی وختہ اوا دی ایہہ ݯوکیتام۔ ایہہ نیسیکو کافی وخت بغائے۔ ایہہ نیستام کی جم میدان ژاغہ طبیعتی  بیتی خلتو ہوست اواتام کی برٹ قفی نو ہائے۔ زران بیتی خلتو یُو گانیتام کی برٹو پالمان سار غیر تو کیاغ نکی۔لش لش کوری اپاکی پیڅھی کھولئیرو بیراتام۔پریشان بیتی ہے ہایی لوڑیتام کی  میکی نکی۔ دودیری ژاغا لاڑیمان کی کھوشون نیسیران.  تیرا بغاتام کی تروق چائے ذاپ لاچھوران ہانیہ میکی پیدا ہوئے۔  پایو دوئیی پُھک ݯھیر انگیرو بیرائے۔ ہتو چایو دیتی تیارئے قوپو درے پستہ لاکھی ای ہوستین دونو دوسی یی کوئیے ڈق برٹو نسار ریتائے۔

بیکو رونځاؤ ہسے کھل ہوئے ریتام۔ بیکو دونو لاکی حیران بیتی کیانی بیتی ریکو. ایوتام ریتام۔ ژان قوپو پیڑینگی دیتی دونو مورییاؤ بوختو تھائقہ دیتی تھے متے دش لُو کوری اسور وا لُو دیکو بݰ نو۔ کاکی میکیو سُم بلت ہتیت ہوݰ کونی کی کندوری ناہنجار دش لُو بونی رے۔

میکی ہے کھوشونو گوݯہ نیشی دش لُو اریر اوا پھارو ڈوکا نیشی تو لوڑیتام۔ بو مُدا اچہ  ریتائے کی اے لوٹ خوئینی یُو دیتیے ایہہ بی پایان اف الوسی۔

اوا جم لہ میکی رے ہوسی ایہہ  روپھی پایانتے شیڑئے پھار بغاتام۔

میکی اللہ تتے لوڑار تہ رینیوتے،  تہ گانی سوسیری گیاکوتے تھوت مہ شینڈیری ماریتاؤ رے

پچھانی غیریکا پت ہواز مہ کارہ  دیاؤ اوشوئے۔

اللہ میکیو قبرا نور کورار۔ آمین!

نور شمس الدین کا تعلق چترال سے ہے۔ آغا خان ہائیر سیکنڈری اسکول شیر قلعہ میں بحیثیتِ وائس پرنسپل خدمات سرانجام دے رہے ہیں۔

اس خبر پر اپنی رائے کا اظہار کریں

اپنا تبصرہ بھیجیں